महापरिनिर्वाण दिन नियोजन बैठकीत सुरक्षा वाढवण्याची मागणी; विलास रूपवते यांचा महत्त्वाचा मुद्दा आयुक्तांच्या लक्षात

मुंबई | दिनांक 1 डिसेंबर 2025 रोजी मुंबईतील ओल्ड कस्टम हाउस येथे डॉ. बाबासाहेब आंबेडकर महापरिनिर्वाण दिनाच्या आयोजनाबाबत उच्चस्तरीय बैठक पार पडली. कोकण विभागीय आयुक्त डॉ. विजय सूर्यवंशी यांच्या अध्यक्षतेखाली झालेल्या या बैठकीस आंबेडकरी चळवळीतील प्रमुख कार्यकर्ते आणि संबंधित विभागांचे अधिकारी मोठ्या संख्येने उपस्थित होते.

बैठकीला श्री नाक्षन कांबळे, श्री महिंद्र साळवे, विलास रूपवते, श्री प्रतीक कांबळे, श्री प्रदीप कांबळे, श्री शरद कांबळे, श्री संजय भालेराव, श्री आशिष गाडे, श्री मनोज गायकवाड यांच्यासह इतर मान्यवर नेते उपस्थित होते. सर्वांनी आयोजन, व्यवस्थापन, वाहतूक नियंत्रण आणि सुरक्षा याबाबत विविध सूचना मांडल्या.

महत्त्वाची सूचना: गर्दीत वाढणाऱ्या चोरीच्या घटनांवर लक्ष द्या — विलास रूपवते

बैठकीतील सर्वाधिक लक्षवेधी मुद्दा विलास रूपवते यांनी मांडला.
त्यांनी सांगितले की 6 डिसेंबरला मुंबई, महाराष्ट्र तसेच ग्रामीण भागातून लाखो भीम अनुयायी महापरिनिर्वाण दिनासाठी दादर चौपाटी परिसरात येतात, ज्यामुळे मोठी गर्दी निर्माण होते.

अशा गर्दीचा फायदा घेत मोबाईल, पाकीट आणि विशेषतः मंगळसूत्र चोरी करणारे टोळके सक्रिय होतात, ही गंभीर बाब त्यांनी उपस्थित केली.

2024 मधील प्रत्यक्ष घटना बैठकीत मांडली

रूपवते यांनी 2024 मधील एक प्रत्यक्ष घटना सांगितली —
गर्दीतच एका महिलेचे २ तोळ्यांचे मंगळसूत्र चोरीला गेले. त्या महिलेनं पोलिसांत तक्रार नोंदवली. मात्र त्या परिसरात सीसीटीव्ही कॅमेरे नसल्यामुळे पुरावा उपलब्ध झाला नाही आणि चोर पळून गेले.

ही बाब त्यांनी आयुक्तांसमोर तातडीने उपस्थित केली.

आयुक्त डॉ. सूर्यवंशींची तत्काळ दखल — पोलिसांना आदेश

विलास रूपवते यांनी उचललेल्या मुद्द्याची गंभीर दखल घेत
आयुक्त डॉ. विजय सूर्यवंशी यांनी त्वरित पोलिस विभागाला निर्देश जारी केले:

• संवेदनशील भागात अतिरिक्त सीसीटीव्ही कॅमेरे बसवणे

• गर्दी नियंत्रणासाठी अधिक पोलिस बंदोबस्त तैनात करणे

• चोरट्यांवर लक्ष ठेवण्यासाठी स्पेशल स्क्वॉड नियुक्त करणे

• महिला सुरक्षेसाठी विशेष पथक तैनात करणे

बैठकीत उपस्थित सर्व नेत्यांनी या निर्णयाचे स्वागत केले.